Hay’adda amnesty International oo 24-kii saac ee la soo dhaafay soo saartay labo warbixin oo ku saabsan xadgudubyada iyo dambiyada dagaal ee laga gaysanayo dalka Soomaaliya ayaa soo jeedisay hindise ah in beesha caalamka ay baaritaan ku sameeyaan kaalinta ay dawladda Maraykanka ku leeyahay xadgudubyada ka dhanka ah xuquuqda aadanaha iyo dambiyada dagaal ee ka dhacaya dalka Soomaaliya.

Hay’adda Amnesty Internatinoal ayaa warbixino laga laga soo ururiyay dad Soomaali ah oo ka qaxay dagaalada Muqdisho in ciidamada Itoobiya iyo kuwa dawladda federalka Soomaaliya ay falal liddi ku ah xuquuqda aadanaha u geysteen qoysas shacab ah oo ka barakacay magaalada Muqdisho kuwaasoo ku dan darraysayn goobo ay deegaano ka dhigteen oo ku yaalla afaafka magaalada Muqdisho.

Amnesty International ayaa warbixinteeda ku sheegtay in gabar lagu magacaabo Haboon oo ka mid ah qoysaska ka barakacay magaalada Muqdisho ayay hay’adda u xaqiijisay in ciidamada Itoobiya ay kufsi wada jir ah u geysteen gabar 17 jir ah oo deris la ah, waxayna intaa ku dartay in wiilal la dhashay gabadha oo da’doodu u dhexeysay 12-13 oo isku dayay inay difaacaan gabadha walaahood ahna ay ciidamada Itoobiya baynaad kaga bixiyeen labada indhood.

Hay’adda Amnesty international ayaa sidoo warbixinteeda ku sheegtay dawladda Maraykanka ay tababarro siiso ciidamada Itoobiya, isla markaana ay dhaqaale ku bixiso hawl gallada ay ka wadaan dalka Soomaaliya oo ay ku dhibaataynayaan shacabka Soomaaliya, waxayna intaa ku dartay in ciidamada Itoobiya ay dagaalladii ugu dambeeyay ee dhex maray iyaga iyo xoogagga ka soo horjeeda ay gowraceen tiro dad ah oo u badan culimaa’udiin oo ay ku weerareen masjid ay ku cibaadaysanayeen.

Ugu dambeyntii hay’adda Amnesty International ayaa beesha caalamka iyo Midowga Yurub in baaritaan lagu sameeyo kaalinta uu Maraykanku ku leeyahay dambiyada dagaal ee ka dhacaya dalka Soomaaliya, sida u sheegay sarkaal ka tirsan hay’adda Amnesty Internatinal.

cowslafil,news,network (CNN) email: cowslafil@cowslafil.com