Wararka laga helayo magaalada Baydhabo ayaa waxay sheegayaan
in gebi ahaanba waddooyinka lagu soo daadiyay saakay
ciidamo aad u fara badan oo Itoobiyaan ah isla marakana
la joojiyay isu socodkii gaadiidka iyo dadweynaha ee
gudaha magaaladaasi, marka laga reebo xildhibaanada
oo saakay kulan ku yeelan xarunta ADC-da ee dawladda
iyo ciidamada Soomaalida ah.
Xiritaanka ay ciidamadan xireen waddooyinka magaalada
Baydhabo ayaa waxa ay ka dambeysay kaddib markii habeenkii
xalay ahaa qarax lala beegsaday saldhig boolis oo ku
yaallay bartamaha magaalada Baydhabo iyo saakay oo la
filayo in xubnaha baarlamaanka oo muddo isku khilaafsanaa
sii socoshada hawlaha baarlamaanka uu si rasmi ah uga
furmo magaalada Baydhabo, waxaana xiran inta badan goobihii
ganacsiga iyo isu socodka gaadiidka.
Wararka laga helayo magaalada Baydhabo ayaa waxay sheegayaan
in sababta ciidamadan fara badan loo soo dhoobay gudaha
magaalada Baydhabo lagu fasiray in ay suurto gal tahay
inay soo gaaraan madaxda sar-sare ee dawladda federalka
Soomaaliya qaarkood xilli maanta uu si rasmi ah u frmi
doono, kulankii muddada dheer la sugayay kaddib markii
ay maalintii shalay ahayd yimaadeen magaalada Baydhabo
57 xildhibaan oo ka kala yimid magaalooyinka Nairobi
iyo Muqdisho kuwaasoo ah kuwii buuxin lahaa kooramka
uu ku furmi karo kulanka baarlamaanka.
Ajeendayaasha baarlamaanka uu ka hadli doono ayaa dadka
ku dhowdhow magaalada Baydhabo xubnahooda baarlamaanka
waxay sheegeen inuu u qeybsan yahay labo qeybood oo kala
ah sidii loola xisaabtami lahaa xukuumadda Nuur Xasan
Xuseen (Nuur Cadde) iyo kuwo kale oo doonaya iyaguna in
lala xisaabtamo saddexda masuul ee ugu sarreysa dawladda
federalka Soomaaliya ee aan lagu ekaan Nuur Cadde oo kaliya,
fikradahaasi oo ah kuwo si aad ah isaga soo horjeeda balse
la arki doonee.
cowslafil,news,network (CNN)
.
