Safiirka dalka Maraykanka u fadhiya magaalada Nairobi
Micheal Renbeigner oo wareysi siinayay wargeyska Daily
Nation ee ka soo baxa dalka Kenya ayaa sheegay in xukuumadda
Washington ay dooneyso in si deg-deg dalka Soomaaliya
loogu daad gureeyo ciidamo nabad ilaalineed oo ka socda
Qaramada Midoobay si wax looga qabto xaaladaha ammaan
iyo bini’aadanimo ee ka jira dalka Soomaaliya.
Safiirka Maraykanka u fadhiya dalka Kenya ayaa sheegay
in dawladda Maraykanka ay ka codsatay Qaramada Midoobay
in ciidamo nabad ilaalineed oo ka socda Qaramada Midoobay
maalmo gudahood la geeyo dalka Soomaaliya, wuxuuna intaa
ugu daray in dalalka xubnaha ka ah Golaha Ammaanka ay
ugu baaqeen inay wax ka beddelaan mawqifkooda iyo siyaasadooda
ku aaddan dalka Soomaaliya.
Safiirka wuxuu sheegay in muhiimadda ugu weyn ay tahay
in sare loo qaado dimoqraadiyad iyo doorasho xor ah
oo ka dhacda dalka Soomaaliay xilliga kala guurka ee
sanadka 2009-ka taasoo buu yiri wax weyn ka beddeli
doonta kala duwanaanshaha fikirka iyo is jiid-jiidka
siyaasadeed ee dagaalka ku salleysan ee ka jira dalka
Soomaaliya.
Safiirka Maraykanka ee dalka Kenya wuxuu sheegay in
xukuumadda Washington ay qaadi doonto tallaabo kasta
oo ay kula dagaalamayaan kooxaha Argagaxisada oo doonaya
inay hoy nabad gelyo ah ka sameystaan dalka Soomaaliya,
wuxuuna ku cel-celiyay in ay aad uga so horjeedaan in
Soomaaliya ay noqoto hoy argagaxiso oo ay ku soo qulqulaan
shaqsiyaad argagaxiso ah oo ka yimaada dalalka Paksitan
iyo Afghanistan.
Safiirka wuxuu sheegay in magaalada Muqdisho ay ka
taagan tahay xaalad nabad gelyo xumo tii ugu darneyd,
wuxuuna meesha ka saaray in Maraykanka uu qorsheynayo
inuu ciidamo u diro dalka Soomaaliya, wuxuuna taasi
beddelkeeda sheegay in ay lagama maarmaan tahay in Qaramada
Midoobay ay ciidamo u dirto dalka Soomaaliya, ciidamadaasi
oo loo baahan yahay inay noqdeen kuwo dhex-dhexaad ah
oo aan dhinacna la safan isla markaana hanta nabad iyo
xasiloonida magaalada Muqdisho iyo guud ahaan dalka
Soomaaliya.
cowslafil,news,network (CNN)
.
