Qoysaska barakayaasha ah ee ku jira xerooyinkaasi qaxootiga oo ka kala yimid gobollada Banaadir, Bay iyo deegaanada ismaamulka Soomaalida Itoobiya ayaa waxaa soo food saartay xaalad nololeed iyo bini’aadanimo tii ugu darneyd iyadoo aanay jirin wax hay’ado samafal ah oo gar-gaar gaarsiiyay qoysaskaasi, waxaana lagu soo warramayaa in qaar ka mid ah caruurta ku sugan xerooyinkaasi ay nafaqo darro awgeed ay indhaha la beeleen isla markaana ay cagaha uga bar-barareen.

Qoysaka soo barakacay ee ku nool xerooyinka qaxootiga ee ku yaalla magaalada Beledweyne ayaa waxaa nafaqo darrida u weheliya cudurro ay ka mid yihiin Malaariyada, Tiifowga iyo cudurrada maqaarka gala, waxaana iska cad oo aan shaki ku jirin in haddii aysan gar-gaar helin waqtiyada soo socda ay in badan oo ka mid ah caruurta iyo haweenka xerooyinkaasi ku sugan ay naftooda halis galeyso.

Iyadoo ay intaasi oo dhibaato ah ay ka jiraan xerooyinkaasi qaxootiga ayaa haddana waxaa maalinba maalinta ka dambeysa soo gaaraya qoysas hor leh oo ka soo baracaya iska hor imaadyada iyo abaaraha ka jira gobollada dalka Soomaaliya, waxayna qoysaskaasi ka codsadeen hay’adaha samafalka iyo walaalahooda Soomaaliyeed ee iyaga dhaama inay gar-gaar la soo gaaraan.

cowslafil,news,network (CNN) .

email: cowslafil@cowslafil.com.