Madaxweynaha Soomaaliya C/llaahi Yuusuf Axmed ayaa saaka ka dhoofay Garoonka Diyaaradaha Muqdisho, iyadoona muddo saacado ay u xirnaayeen qaar ka mid ah wadooyinka Muqdisho. Ka hor inta uusan dhoofin Madaxweynaha ayaa Ciidamada Ethiopia iyo kuwa Dowladda waxay u xireen Wadooyinka gala Isgoyska Km4, si aan loo beegsan Gawaarida galbineysa Madaxweynaha inta ay ku sii jeedaan Garoonka.

Madaxweyne Yusuf wuxuu sii mari doonaa Magaalada Nairobi, isaga oo kaga sii gudbaya Magaalada Qaahira ee Dalka Masar, halkaasoo Maalinta isniinta uu kaga qeyb geli doono Shir madaxeedka Afrika.

Magaalada Qaahira waxaa ku sugan Wasiirka Arrimaha Dibada Dowladda Federaalka oo ka qeyb galay shirka Wasiirada Arrimo dibadeedka Afrika, oo ahaa mid loogu gogol xaarayay kan Madaxweynayaasha yeelan doonaan Isniinta.

Lama soo sheegin wax weerar ah oo loo geystay Garoonka intii Madaxweynaha ka dhoofayay garoonka, waxaase muuqatay in amaanka aad loo adkeeyay goob walbana la dhigay Ciidamo.

Kooxaha kacdoonka ayaa weeraro la beegsan jiray marka Madaxweynaha dhoofayo ama soo degayo, waxaana labo jeer oo hore la beegsaday Kolonyada Madaxweynaha, taasoona si dirqi ah uu Madaxweynuhu kaga dhoofay Garoonka.

cowslafil,news,network (CNN) .

email: cowslafil@cowslafil.com.