Madaxwaynaha dawladda federalka Soomaaliya Md. C/laahi Yuusuf Axmed oo waraysi siinayay TV-ga afka carabiga ku hadla ee Al-jaziira ka hor intuusan ka ambabixin dalka Jabuuti ayaa ku eedeeyay dawladda Qadar inay xasilooni darro ka waddo dalka Soomaaliya iyadoo isticmaalaysa dhinaca siyaasadda iyo warbaahinta.

Madaxwayne C/laahi Yuusuf ayaa sheegay inay imaan doonto xilli ay dalalka Carabta kula xisaabtaan sida ay gacanta uga geysteen xasilooni darrida dalka Soomaaliya ka jirtay, wuxuuna ku tilmaamay in dawladda Qadar ay isticmaalayso siyaasad cadaad xambaarsan oo ku wajahan dhanka Soomaaliya, isagoo si gaar ah farta ugu fiiqay TV-ga Al-jaziira oo uu sheegay inuu janjeero dhinaca Mucaaradka.

Madaxwayne C/laahi Yuusuf ka dhawaajiyay in 10-ka bisha July ee soo socota kulan lagu qaban doono magaalada Makkah ee dalka Saudi Arabiya kaasoo uu sheegay in lagu rasmiyeynayo heshiiskii ay dawladda federalka iyo isbahaysiga Mucaaradka ay ku saxiixeen dalka Jabuuti, wuxuuna intaa ku daray in boqortooyada Sacuudiga ay kala hadli doonaan fara gelinta dawladda Qadar ay ka waddo dalka Soomaaliya.

“Ciidamada Itoobiya waxay dalka ku yimaadeen heshiis, wayna baxayaan marka uu dhamaado waqtiga loo qabtay, dawladda federalka ayayna quseysaa mar walba bixitaanka ciidamada Itoobiya, wayna dhacaysaa in heshiiskaasi ay ku baxaan” ayuu yiri madaxwayne C/laahi Yuusuf oo intaa ku daray inaysan jirin caqabado hor taagan heshiiska ay ku gaareen dalka Jabuuti, wuxuuna ku nuux-nuuxsadya in dhankooda ay ka go’an tahay dawlad ahaan inay meel mariyaan qodobada heshiiska Jabuuti.

cowslafil,news,network (CNN) .

email: cowslafil@cowslafil.com.