Sarkaal sare oo ka tirsan Ururka Xisbul Islaam laguna magacabo ALLAHA u naxariistee Barre Cali Barre ayaa goor dhoweyd oo barqanimadii maanta ah lagu toogtay gudaha Suuqa Bakaaraha ee magaalada Muqdisho oo ay gacanta ku hayaan xoogaga ka soo horjeeda dowladda Somalia.

Marxuum Barre dilkiisa ayaa yimid ka gadaal markii kooxo bastoolado ku hubeysan ay weerar ku soo qadeen xilli uu ku sugnaa agagaarka qeybta sarifka lacagaha qalaad ee Suuqa Bakaaraha, kuwaasoo madaxa kaga dhuftay dhowr xabadood oo sababay in marxuumka uu isla goobtaasi ku geeriyoodo.

Dilka Barre Cali Barre ayaa waxaa xaqiijiyey gudoomiye ku xigeenka maamulka gobolka Banaadir ee ururka xisbul Islaam Shiikh Ibraahim Cismaan kaasoo sheegay in meydkiisa ay ka soo qaadeen Suuqa Bakaaraha gudihiisa, ayna wadaan baaritaan la xiriira cidii ka dambeysay.

Kooxihii dilkaasi geystay ayaa iskaga dhaqaaqay goobta lamana oga illaa hadda cida rasmi ahaan ka dambeysay dilkiisa hase ahaatee Barre Cali Barre ayaa ka mid ahaa saraakiisha Xisbul Islaam ee ka soo horjeestay markii la shaaciyey in Shiikh Xasan Turki iyo rag la socda ay ku biireen Xarakada Mujaahidiinta Al Shabaab, isagoo hada ka horna warbaahinta ka sheegay inuu ka badbaaday bam gacmeed lagu weeraray hoygiisa.

E-mail: cowslafil@cowslafil.com