Dowladda Saudi Arabia ayaa waxay sheegtay inay aad
uga walaacsan tahay xaaladda dalka Soomaaliya guud ahaan
gaar ahaan falalka afduubka maraakiibta xeebaha Soomaaliya
iyo biyaha ka baxsan taasoo sabab u noqotay in xeebaha
Badwaynta Indiya iyo Badda Cas ay noqdaan kuwo ugu halista
badan ee dunnida oo lagu ugaarsado maraakiibta ganacsiga
iyo kuwa kale ee xamuulka qaada.
Taliyaha ciidamada badda ee Dawladda Saudi Arabia Admiral
Amiir Fahad Bin Abdullah ayaa waxa uu ka sheegay kulan
ay yeesheen qaar ka mid ah taliyaasha Ciidamada badda
ee dalalka ku bahoobay guddiga wada shaqeynta gacanka
iyo badda Cas oo looga hadlayay sidii loo joojin lahaa
dhibaatada burcad badeedda ayaa waxa uu sheegay in ay
si aad ah u dhibeyso Sacuudiga xaaladda dalka Soomaaliya
ayna Soomaalida ugu baaqeyso inay heshiiyaan.
Amiir Fahad Bin Abdullah wuxuu sheegay in kulankaasi uu
kaga dalbaday dhammaan dalalka ku dherersan Badda Cas
ugu baaqay inay sameeyaan awood isku dhafan oo la dagaalanta
falalka afduubka maraakiibta taasoo noqon karta waddada
kaliya ee looga takhallusi kara weerarada sii kordhaya
ee kooxaha afduubayaasha maraakiibta biyaha Soomaaliya.
E-mail:
cowslafil@cowslafil.com 
