Baarlamaanka Maamul goboleedka Puntland ayaa waxa uu
markii ugu horreysay shaaciyay inaanay awood u lahayn
oo ay u caal waayeen hawlaha tahriibka ee sida xawliga
ah uga soconaya deegaano ka tirsan gobolka Bari iyo
falalka afduubka maraakiibta xeebaha gobollada Maamul
goboleedka Puntland oo haatan lagu haysto dhowr maraakiib
oo laga doonayo lacago madax furasho ah.
Guddoomiyaha Baarlamaanka Maamul goboleedka Puntland
C/rashiid Maxamed Xirsi oo warbaahinta la hadlayay ayaa
waxa uu sheegay in Maamulkooda uusan awood u lahayn
inuu ka hor tago hawlaha tahriibka ee ka soconaya deegaano
hoos yimaada gobolka Bari halkaasoo ay maalin walba
ka baxaan boqollaal tahriibayaal isugu jira Soomaali
iyo Itoobiyaan kuwaasoo safar halis ah oo dhinaca badda
isaga kala goosha biyaha u dhexeeya dalka Yemen iyo
xeebaha gobollada Bari ee Puntland.
C/rashiid Maxamed Xirsi waxa uu sheegay in kororka
tahriibka ee xilligan ay sabab u tahay deggenaansho
la’aan iyo colaad baahsan oo ka jirta koonfurta
Somaaliya gaar ahaan magaalada Muqdisho halkaasoo ay
maalin walba isaga soo cararaan boqollaal rag, dumar
iyo caruurba isugu jira, wuxuuna dhinaca kale sheegay
in tahriibka uu noqday hawl maalmeed ay shaqo ka dhigteen
rag iskaashaday oo samaystay doomo kuwaasoo mararka
qaar tahriibayaasha ku qasba inay ka degaan doomaha
meel ka fog xeebaha dalka yemen.
Guddoomiyaha baarlamaanka Maamul goboleedka Puntland
C/rashiid Maxamed Xirsi ayaa dhinaca kale sheegay in
falalka afduubka maraakiibta xeebaha ku dherersan gobollada
uu ka taliya maamulkooda uu sii kordhayo oo aysan awood
u lahayn inay ka hor tagaan kaligood, wuxuuna intaasi
ku daray in maamul goboleedka uu qaaday tallaaboyin
wax looga qabanayo falalka afduubka balse aanay sidii
la rabay waxba uga qaban sababo badan oo jira awgeed.
E-mail:
cowslafil@cowslafil.com
