|
Wasiirka
Lacagta Dawladda federalka Soomaaliya Eng. C/raxmaan Cumar
Yariisow oo saxaafadda kula hadlayay magaalada Muqdisho
ayaa waxa uu sheegay inay heer gabogabo ah marayso qorshaha
daabacaadda lacagaha cusub ee Shilin Soomaaliga ah oo
ay dhowaan heshiis arrintaasi ku saabsan ay la galeen
dawladda Suudaan.
Eng. C/raxmaan Cumar Yariisow wuxuu sheegay in muddo lix
bilood gudahood ay lacagahaasi ku soo gaari doonaan dalka
gudihiisa kuwaasi oo uu sheegay inay wax weyn ka beddeli
doonaan sicirka aan fadhiga lahayn ee suuqyada iyo in
laga kaaftoomi doono isticmaalka kunka Shilin Soomaaliga
ee duugga noqday ee aan lahayn sarrifka.
“Lacagta cusub ee la daabacayo waxay wadataa dhammaan
calaamadihii astaamaha qaranka Soomaaliyeed sida sawirrada
dhismayaasha caanka ah ee Soomaaliya, wax soo saarka sida
muuska, Hidaha iyo dhaqanka iyo kuwo kale” ayuu
yiri Wasiirka Lacagta dawladda federalka Soomaaliya oo
intaasi ku daray in lacagaha la soo daabacayo ay ka mid
noqon doonaan kun Shilin, labo kun, Shan Kun, Toban Kun,
Labaatan Kun iyo Konton Kun.
Wasiirka lacagta dawladda federalka Soomaaliya Eng. C/raxmaan
Cumar Yariisow wuxuu sheegay in inta aan lacagahaasi soo
gaarin dalka Soomaaliya ay ku dadaali doonaan inay ka
shaqeeyaan sidii ay lacagahaasi u dhaqan geli lahaayeen,
wuxuuna ka codsaday Maamul goboleedkada sida Puntland
oo kale inay kala shaqeeyaan dhaqan gelinta isticmaalka
lacagtan cusub ee Shilin Soomaaliga ah.
E-mail:cowslafil@cowslafil.com
|
